البارح ، أنا قاعد رايض علي روحي ومستكوزي، قلت خلي نعمل طلّة علي المدوّنة نشوف آش فمّا جديد. نلقي تعليق خارج عن الموضوع من عند واحد مجهول و موش خوّاف بالكلّ :) و هاو التّعليق آش يقول:
سمسوم الجبار انت زعيم الحملة الاخخخرة زعمة تقويييو قلوبكم وتعملونا حملة قويييية برشة ضد ترشح الزعبع لانتخابات 2009
هيا تشجعو وخلي يا طورة يا فورة
هانا نستنو فيكم
لا يخسر المدون الا تدوينته
أنا راسى ديجا شايب والسّيّد يحبّ يكمّل يرزيني فيه. آما هاني شدّيت روحي وما قطّعتوش و بش نجاوبك:
1) أنا لاني شمشوم ولاني جبّار. أنا بعد هذا الاقتراح المشوم بش نولّي من أتباع بني مكتوم خير ماللّي نرقد ما نقوم
2)أنت سيدي شناقصك بش تعبّر علي رغباتك علي المدوّنة متاعك. هاك تعرف تكتب وبالعربيّة زادا. موش غريبة شويّة أنّك تطلب طلب شجاع كيما هذا وتنفخلي في ليّتي وتمدح فيّا وانت ما عندكش الشّجاعة بش تعرّف علي نفسك. ريتني نرضع في صبعي ولاّ حاطت بلاكة "زعيم حملات يلوّج في خدمة"
3) ويجا هنا يا سيّد . أنت شكون قالّك اللّي أنا ضدّ التّرشّح اللّي هو شرعي مائة في المائة. أنا نحبّ الانتخابات تكون شفّافة وموش مطبوخة واللّي يربح صحّة ليه. امّ تحبّ تحطّني علي رأس ثورة تطعن في الدّستور ، لا يا خويا. آش عمتلك، تسالني مغرفة دقيق؟ برّا ثو ر وحدك وربّي معاك
4) و شبيك تتكلّم بالجمع، آشكونكم يا خويا. عرّفونا علي أرواحكم، خلّي الواحد يعرف مع شكون يحكي
5) خويا العزيز، أنا نسلّك فيها بالسّيف ، مّزلت كتعلّمت نعبّر بحريّة, كي الصّغير اللّي يددّش ، تجي تحطّني علي حبل مانيش شايف حتّي فين ماشي وتقلّي امشي و هانا وراك. دوّيو، مانيش من المرتزقة ولاّ ملّي أيّسوا من حياتهم وطامعين في الجنّة. تي أنا كلّ ما نكتب حاجة جريئة تشيشا، نبدي جوفي جارية و وجهي أصفر يعلم بيّا ربّي آش نحسّ وهذايا قاعد علي كرسي في داري وبعيد 10000كم و كلّ مانزيد نتجرّأ أكثر كلّ ماالخوف يزيد. تجي تطلب منّي طلب كيما هكّا، لا واللّه عيب عليك أنّك تغلط فيّا بالشّكل هذا
6) فمّا فرق بين واحد يفضح أمور غالطة في نظره ويتكلّم بصراحة و يطلب من أصحابو أنّهم يعبّروا علي آراءهم وبين واحد يطالب بأمور غير قانونيّة الليّ تدخّل للفينقة. في الحقيقة أنا مازلت ما وصلتش لدرجة النّضج والشّجاعة اللّي تخلّيني ندخل في مشروع من النّوع هذا و حتّي كان صار أنا نفرح برشا أمّا بالسّرقة
وكيم تقول أمّي اللّي مازالت حاجتها بيّا اللّي عندو دبارة يعملها في عشاه
